前日我哋影到外號「李漢奸」嘅民主黨創黨主席李柱銘，夜會壹傳媒肥佬黎同一位西人。尋日又見到李漢奸接受電視台訪問，與同樣做過《基本法》草委嘅民建聯主席譚耀宗（譚Sir）辯論特首普選，譚Sir喺節目中多次發威，窒到李漢奸一戙都冇。據聞呢個訪問係幾日前錄影嘅，唔通李漢奸知道自己衰咗，所以隔幾日就搵埋肥佬黎向西人求教？
李漢奸喺節目中，批評全國人大法律委員會主任喬曉陽有關特首選舉嘅言論超出《基本法》規定。譚Sir就立即更正，強調喬曉陽嘅講法係基於○七年嘅人大常委會決定，同《基本法》一樣必須遵循，又強調中央有權任命特首，「你做老闆，都唔會委任個對抗你嘅CEO（行政總裁）啦？」李漢奸又批評中央信唔過香港人，譚Sir就嘆晒氣咁話，中央缺乏信心，泛民主派要負上好大責任，因為政改諮詢未開波，泛民就起晒弶話要「佔領中環」，如果泛民當選做特首，香港可以點算？
問及一旦中央拒絕任命港人一人一票選出來嘅特首，會有乜嘢結果？李漢奸居然支持進行重選，與港府嘅想法不謀而合，睇嚟佢遲早又要向泛民公開道歉及收回言論。李漢奸又死撐外國選舉都無類似限制，譚Sir就澄清香港唔係一個獨立國家，再次「擊倒」李漢奸，睇嚟李漢奸不如早啲返歸好過喇。