政情：建制派剪布唔齊心

三十六名建制派議員尋日憤然走出會議廳外，批評拉布嚴重損害市民福祉之餘，仲聯署致函曾鈺成叫佢運用《基本法》賦予嘅職權「剪布」。早前唔肯派人參與輪更開會防流會、抗拉布嘅自由黨，今次依然琵琶半遮臉，口口聲聲話支持主席剪布，但言行不一，唔肯參與聯署之餘，該黨榮譽主席田北俊仲同方剛都唔喺香港，一齊去搭遊埠。

怪醫認低調 冇人搵聯署

該黨張宇人解釋話，唔參與聯署係要畀主席絕對嘅自由度同空間就拉布行為作出裁決喎。所以該黨反拉布有幾出力，真係睇得一清二楚。另外，冇參與聯署嘅仲有「怪醫」梁家騮，佢解釋唔聯署係要貫徹自己一向低調嘅作風，低調到連建制派都忘記搵佢參與聯署喎。咁依家又會唔會簽番個大名呢？怪醫依然話要保持低調！唔怪得冇人搵佢聯署喇，事關搵嚟都嘥氣。

建制派除咗簽名聯署反拉布唔齊心外，尋日開會令感到意外嘅係，沉默多時嘅西九新動力梁美芬（鼠王芬）忽然又再發炮，批評拉布議員既然覺得衞生署牙科服務做得唔夠好，點解唔係提出修正案增撥資源，反而係去大幅削減開支呢？可惜鼠王芬出師未捷，除咗被主席教訓佢批評無理外，仲被人民力量陳偉業（大舊）寸佢根本冇心機聽拉布議員發言，又寸佢嘅言論有侮辱性。

講冒犯性言論 長毛認衰

鼠王芬忽然彈起身出聲反拉布，唔知係咪同前日一個民意調查話佢嘅民望大幅下跌有關呢？無論係咪真都好，作為建制派嘅謝偉俊見到鼠王芬被人蝦，發言時就大鬧拉布議員講嘅嘢係垃圾，而長毛梁國雄就鬧建制派議員食咗狗飯，結果長毛被主席裁定講咗冒犯性言論，要求佢收回，否則就要離開會議廳，最後長毛都死死地氣收回言論。

講開又講，我哋尋日講過前日特首答問大會有個別官員用手機上網，除咗教育局局長吳克儉上網睇股市之外，又見政制及內地事務局局長譚志源不斷快速掃動電話屏幕，好似玩緊遊戲咁。譚志源新聞秘書就向我哋澄清話，局長並無玩遊戲，只係睇緊文件啫。