中環出更：廈門工展佳麗 放吳永嘉飛機
中華廠商聯合會舉辦嘅工展小姐選舉，今年首次走進內地，於福建廈門舉行，廠商會副會長吳永嘉（Jimmy）、吳清煥、楊志雄等擔任大會評判。Jimmy話，今次選舉最難忘係有十多位佳麗報咗名之後，以各式各樣嘅古怪理由「放飛機」，殺佢一個措手不及，好彩剩下佳麗都夠晒數，選舉終能如常進行。
未選先打定輸數 走剩一半
話說廈門工展小姐選舉經過首輪篩選後，共有四十位佳麗入圍，但到第二輪面試嘅時候，報到人數居然得番二十幾個，其他美女去晒邊？Jimmy話，原來有部分佳麗入圍後突然「縮沙」，原因係未選都覺得自己輸梗喎。另外仲有啲本身做模特兒嘅靚女，竟然因為接咗其他工作而臨時缺席，各種理由都令到佢「大開眼界」。
Jimmy慨嘆，冇諗到首次辦內地選美會就甩晒轆，幸而準時報到嘅佳麗均高質素，最驚喜係幾乎全部佳麗都高過佢喎。今趟芸芸佳麗來自各行各業，最多係模特兒、舞蹈學院及演藝學院學生，有啲仲參加過內地嘅選美活動。Jimmy話，為免參選佳麗背景複雜，早已委託廈門一間製作公司進行「過濾」，確保參加者身家清白。
卓妮