中環出更：林煥光密密斟 想收平機會風？
行政會議召集人林煥光（WK）周不時都會搵人傾偈收風，卓妮前日就見佢同會計師公會會長趙麗娟喺中環歷山大廈一間咖啡店傾偈密密斟。須知趙麗娟目前仍然係平等機會委員會成員，但WK喺三月底已卸任平機會主席，究竟兩人今次純粹朋友敍舊之外，WK仲有冇趁機收吓平機會嘅風聲呢？睇吓人稱「廢官」嘅前食物及衞生局局長周一嶽領導下嘅平機會，有否迅速敗壞名聲同自廢武功？
前日下午二時十分，WK同趙麗娟由中環太子大廈行去歷山大廈一間咖啡店飲嘢傾偈，期間WK不時指手畫腳，傾咗大約一個多小時後，WK先行離開並走入中環港鐵站，原來係趕住搭港鐵去金鐘立法會出席特首答問大會。卓妮上前同WK打招呼，問佢哋有乜咁好傾，佢話同趙麗娟認識多年，之前又一齊出席活動，所以有時間就一齊飲杯嘢。被問及點評價周一嶽上任平機會主席後嘅表現，WK就話新舊主席已經交接清楚，有乜問題應該問番周一嶽喎。
卓妮又問WK有冇留意前廉政專員湯顯明濫用公帑請宴同送禮畀內地官員，佢就話政府同立法會分別跟進緊事件，所以依家唔方便出聲。講完一輪後，WK就向金鐘方向離去。雖然唔知WK同趙麗娟有乜嘢密斟，但翻查資料顯示，當外界質疑WK早前同時出任行會召集人同平機會主席會出現利益衝突時，趙麗娟係其中一個開腔贊成WK留任兩個公職嘅委員，顯示二人都惺惺相惜，互相收下風、月旦下政經時事都唔出奇嘅。
趙麗娟連任平機會委員
講開平機會，政府尋日宣布委任十六名成員，其中十二人係再度獲委任，包括趙麗娟、立法會議員謝偉俊等人，至於衞生服務界議員李國麟同離島委任區議員周浩鼎等四人為平機會新成員。
卓妮