新聞故事：舊店近黃昏 往事只能回味

漫畫店租埋小說

「科技改變世界，亦改變我哋呢行。」廖先生在北角經營漫畫店逾十六年，八、九十年代，本港曾掀起一股哈日熱潮，日本漫畫大受歡迎，租借漫畫店開到成行成市；時而勢易，熱潮一去不返。「依家上網有得下載睇，加上消遣、娛樂多咗，鍾意睇漫畫嘅人愈嚟愈少。如果佢哋真係鍾意套漫畫，都寧願買多過租嚟睇。」廖坦言，以往六至七成顧客都是學生，現在學生只佔一成。

舊客一個個少，新客又不多，他遂於三年前購入兩萬多本小說，除漫畫以外，兼營出租小說。「淨係靠出租漫畫根本無錢賺，每月舖租都要成萬蚊，所以諗住做埋租小說，睇吓有無得翻身。」

林先生拿着小時候跟家人到影樓拍攝的「全家福」，不禁慨嘆影樓早已成為夕陽行業。	數碼相機的出現，令傳統影樓漸漸被淘汰。	廖先生慨嘆出租漫畫書在互聯網衝擊下，難以生存。

除十元的永久會員費外，每本小說日租七元，利潤較每本漫畫四元為高。雖然生意不理想，但廖先生仍未放棄自己多年來的心血，「依家都算打個和，如果生意差落去，先考慮結業。」

黃先生慶幸影音店能及時轉型，繼續經營下去。	港人心聲：陳先生 無論係電影、流行歌定漫畫，好容易就喺網上搵得到，所以我依家都好少去呢類舖頭買嘢。	羅小姐 依家通街都係一式一樣嘅連鎖店，如果呢類舖頭都做唔住，真係好可惜。

影樓等熟客歸來

「依家只係一直等待。」林先生開設逾半世紀的影樓，在油麻地舊樓群中一個小單位內，他所謂的「等待」，就是每天坐在影樓，為念舊的客人、家庭留倩影。「啲小朋友影完相，都會走埋嚟部相機面前問：『叔叔，畀我睇吓張相！』但我哋用菲林影嘅，邊有得即刻睇，時代已經唔同晒！」

影室曾經熱鬧得很，客人絡繹不絕，但始終敵不過數碼時代巨輪，現在生意水盡鵝飛，「依家都係做熟客，佢哋移民咗去外國，每年放假返嚟先上嚟影張全家福。」訪問當天，帶同從外地親友來拍照的「熟客」吳先生便是其中一人，「以前細個啲證件相、畢業相，甚至結婚相都一定係上影樓影，但相機數碼化之後多咗選擇，就好少再上嚟喇。」

林聽罷，無奈地搖頭說：「呢行已經係夕陽行業，呢條街附近幾間影樓都執咗，連執相師傅亦都無得做，我都唔知可以做得幾耐，都係做得一日得一日啦！」

影音店兼賣文具

「如果當初唔轉型，一早執咗笠！」黃先生的店內擺滿文具精品、玩具，但原來是一間已經營七年的影音店。他慨嘆，高峰時全港逾四百間的影音店，跌至現時不足一百間，「有個行家有四、五間分店，最後一間都守唔住。」商場內原本有五間影音店，現在亦只剩下他這間苟延殘喘。

「以前香港人鍾意一家大細租碟返屋企睇，每逢大時大節，生意做到唔停手。依家個個都上網睇，仲邊有呢支歌仔唱吖。」自《版權條例》生效後，生意成本大增，加上網絡衝擊，生意逐漸走向下坡，黃先生沒有「投降」，兩年前決意博一鋪，兼賣文具精品，至今收入「反客為主」，租碟生意只佔不足一半，「試過有個小朋友話要租碟睇，佢媽咪聽到就話唔使買，返屋企download（下載）睇，真係唔知好嬲定好笑！以前啲客係嚟買碟、租碟，依家就嚟『睇碟』，睇完再返去download，我哋仲邊有得做。」黃先生一臉無奈地說，只求轉型可以令影音店守下去。

文：張凱恩／圖：甘偉倫、關萬亨