新一屆港區全國人大代表團將於本月十七日到粵西茂名、湛江等地考察，為期四至五天，但班港區人大未出發考察就阻滯連連，先有身兼港區人大嘅五名立法會議員吳亮星（星爺）同馬逢國等人，因為財政預算案拉布戰風頭火勢，一早打定輸數無得隨團出發；另外個別人大亦因公務未能出席，睇怕首次考察都無望有三十六名人大嘅整齊合照。
其中一名擁有「雙重身份」嘅金融界議員吳亮星話，因為立法會拉布戰持續，佢一早評估過應該去唔到今次考察團，所以索性連報名都慳番，費事浪費晒有關方面嘅心機。星爺再三強調，自己都想做多啲國家事務工作，但基於大局為重，亦不可以唔處理好屬於香港本位嘅工作。
除咗五名身兼立法會議員嘅港區人大未能隨行之外，首次當選人大嘅新界社團聯會理事長陳勇亦「同病相連」，事關佢早於半年前，已應承出席有份籌辦嘅城市大學校友組織「城賢匯」陝西之行，由於粵西考察團同陜西之行都係本月中舉行，加上佢又想一氣呵成，唔想去一半又唔去一半，所以惟有作出取捨喇。