政情：Greg蘇開口嗑着脷
立法會議員葛珮帆（EQ）喺沙田碩門邨嘅辦事處尋日開幕，除邀請財爺曾俊華撐場外，仲有入贅政府嘅前核心黨員、商務及經濟發展局局長蘇錦樑（Greg蘇）同政制及內地事務局副局長劉江華等，總之就成個舊生聚會咁。點知Greg蘇返到娘家就開口嗑着脷，雖然佢致詞時讚到EQ識飛咁滯，但就讚過龍話EQ「嗅覺敏銳」，潛水仲好叻添！莫非佢當咗EQ動物聞嘢叻，兼夾成日潛水？
實情想讚「觸覺敏銳」
我哋事後問番EQ，問佢嘅嗅覺係咪好敏銳，EQ就話唔係喎。其實Greg蘇係想讚佢嘅「觸覺敏銳」至真呢？至於潛水，就係做議員嘅大忌，如果唔知EQ真係潛水好叻嘅，聽落真係以為Greg蘇想寸佢成日「潛水」唔見人呀，認真大整蠱。黨主席譚耀宗之後仲寸嘴講笑話，Greg蘇讚EQ潛水叻，但係佢就唔識潛水嘞，仲即場教訓黨內議員都唔應該隨便潛水，因為唔睇時間或地點就潛水嘅話，下屆選舉就好難當選喎。