政情：74歲何鍾泰不言退
做得公職就預咗有交棒一日，但凡事都有例外，好似年屆七十四歲嘅前立法會工程界議員何鍾泰（Raymond）咁，擔任大亞灣核電站核安全諮詢委員會成員近四分一個世紀，依家仲以主席身份活躍喺委員會，即使早前委員會想換人，Raymond都安然無恙繼續留低，似乎佢喺核能方面幾有江湖地位。
公職未見顯著減少
Raymond除咗公職未見顯著減少外，亦有好多老友拍膊頭叫佢幫手，好似因應各界對核安全問題日益關注，早年佢就協助城大開辦由核能為主修科目嘅課程，之前已開始收生，估計幾年後就有以核能為主修學科嘅香港畢業生。另外，Raymond較為上心嘅另一個平台，就係佢親自做主席嘅大舜政策研究中心（大舜中心），而中心創立嘅「幕後推手」之一，就係人稱「大Sir」嘅前行政會議召集人鍾士元。
Raymond話，記得三年半前，有日佢同大Sir傾偈時，對方話社會好似冇乜專業人士聲音，終於喺兩年前同立法會議員梁美芬等人成立咗大舜中心，匯聚咗好多專家學者加入，最近亦密鑼緊鼓做緊多個分析研究，中心算係近年智庫中比較多產嘅一個喇。