政情：高官反收禮拉鋸戰
「貪曾」前特首曾蔭權爵士同前廉政專員湯顯明（貪湯）嘅貪腐送禮醜聞不絕，其中貪湯接連被踢爆濫用公帑設宴、送禮同外訪，一手摧毀廉政公署近四十年來辛苦建立嘅肅貪倡廉形象，搞到廉署首次喺公務酬酢等制度程序「被檢討」。據聞各高官為免成為貪曾、貪湯嘅翻版，惟有諗盡招數避嫌「反收禮」，有人會選擇事先同有關方面講明拒收紀念品，有人索性將紀念品留畀駐當地辦事處處理。
索性唔帶走 留低做擺設
貪曾同貪湯醜聞是非停不了，新政府上任後疑想同佢哋劃清界線，一早講明會秉持簡約作風，但落到實處，特別係外訪時真係要做到簡約，高官都要動吓腦筋，事關主辦單位送禮方法層出不窮。有政府中人爆料，有次某高官到內地訪問，內地官員向佢哋每人送上一幅字畫，根本難以放入行李帶返香港；又有次當地官員向政府官員送上水晶，政府官員索性唔帶走，留畀當地駐外辦事處作擺設之用。
內地官拆招 送入酒店房
咪以為政府中人諗盡千方百計拒絕收禮就有用，正所謂「你有張良計，我有過牆梯」，內地官員對於送禮方式名目多多，據聞早年最經典一招係預知高官入住邊間酒店及房間，一早就喺酒店房放晒形形色色嘅禮物，甚至連名都寫埋，迫使有關高官想退回禮物都冇得退。又有前高官同我哋呻話，內地主辦單位以前送埋啲水晶都有晒名稱，結果收收埋埋都有幾個紙箱，真係當垃圾棄置又唔係，繼續收藏又唔係，諗返轉頭收張紀念狀仲有價值喎。
事隔多年後，據聞政府中人依家已經有晒辦法應對上述情況，就係事前同有關方面打定招呼，講到明乜都唔收，有關方面先至有所收斂，一旦真係要互送紀念品，佢哋都會送書籍或年報做回禮，趁機會為有關機構做吓免費宣傳。不過，話說回來，如果唔係「樹大有枯枝」，出現好似貪曾同貪湯呢啲極離譜嘅行為，依家班高官都唔使死咁多腦細胞，諗諗埋埋啲「反收禮」招數喇！