中環出更：沈祖堯 范上達獲頒傑出華人獎
香港醫學界向來名人輩出，本為內科醫生嘅中文大學校長沈祖堯及有「換肝之父」美譽嘅養和醫院肝臟外科中心主任范上達，尋日就獲頒一項世界傑出華人獎殊榮，由英皇集團主席楊受成負責頒獎。咁高興，沈祖堯全家人拉大隊到場分享喜悅，甚少露面嘅范上達太座區嘉麗（Kelly）醫生亦現身支持丈夫，場面溫馨。
從事婦產科專科醫生嘅Kelly話，老公工作咗咁多年，依家攀上人生最高峰，係時候退休抖一抖，享受吓人生，仲話有同老公傾過退休問題。不過，范上達似乎唔多同意，笑笑口話自己從未諗過要退休喎！Kelly話，自從老公一九九一年執刀做本港首宗換肝手術，眨下眼已經二十二年，都已經習慣咗老公咁忙。佢笑稱，當老公搵到第二樣嘢吸引到佢去做，就自然會退休喇！
沈舉家到賀 楊受成頒獎
另一邊廂，沈祖堯父母、太太、千金Winnie、弟弟及弟婦齊晒腳到賀，沈祖堯從英皇集團主席楊受成手中領獎。講到做人處世嘅心得，沈校長嘆謂，現今唔少年輕人都欠缺創業精神，搵工常常以薪金作優先考慮條件，唔肯踏出第一步實現理想。佢寄語年輕人唔好凡事只往錢看，目光要放長遠啲，人工並不等於成就咁話。
沈祖堯喺○三年沙士期間奮勇抗疫，曾經獲傳媒封為「亞洲英雄」。佢囡囡Winnie依家都喺中大讀緊醫科，莫非佢想繼承父業？Winnie即幽默回應：「哈哈，我唔會做校長喎！」至於一直喺身邊默默支持丈夫嘅沈太就好體貼咁話，會繼續支持老公服務社會。
卓妮