政情：辦事處開幕見肚 劉桂容小花變阿媽
喺之前元朗區議會選舉擊敗工黨李卓人嘅工聯會小花劉桂容，原來已經有咗六個月身孕，預產期係八月，尋日就腹大便便喺天水圍天恩邨搞辦事處開幕禮。阿容話，其實自從有咗BB之後就冇停過，呢個辦事處喺去年十二月先至搵到，但之後隔咗個農曆新年，又要搞新辦事處裝修，依家總算安定落嚟，專心靜待BB出世，期望生個肥肥白白嘅夏天寶寶。
老公幫手做司儀
阿容年前未嫁就可以叫「工聯小花」啫，依家嫁咗人仲準備做媽媽，以後應該叫乜好呢？唔會叫「工聯阿媽」啩？其實尋日有份主禮嘅會長林淑儀都提過吓阿容由小花變阿媽嘅問題，但又好似欲言又止咁，睇嚟工聯會真係要幫阿容諗番個新朵，萬一將來又有好似阿人之類嘅人落區挑戰時，到時都有個綽號迎戰嘛！
尋日阿容個辦事處開幕除咗有領導及一眾黨友撐場外，仲有同屬工聯會嘅丈夫、荃灣區議員葛兆源（葛少）幫手做開幕禮司儀添，真係無限量支持。