中環出更：山東鄉里聚首 張震遠講生意經
由來港求學嘅山東籍年輕人組成嘅香港山東青年會，早前換屆就職，創會主席丁華功成身退，由山東妹子尹蕤菡接棒。青年會成立目的除咗聯繫鄉情，更重要係融入香港，所以當晚邀請好多商會代表、其他省市青委成員及嘉賓出席，好似行政會議成員兼市建局主席張震遠（Barry）、「水餃王后」臧健和、前基本法諮詢委員會成員邵友保嘅公子邵公全、中華廠商聯合會青委正副主席顏明潤及顏明秀兩姊妹等。
母親係山東人兼且喺山東出世嘅Barry，對山東特別有感情。佢近年公務繁忙，少咗時間返山東，但係不忘家鄉嘅經濟發展。佢同卓妮講，佢喺山東有投資，包括同中國海洋石油及煙台港集團合作投資石油管道，將石油由煙台港送到山東各地煉油廠。Barry唔講大家幾乎唔記得，其實石油行業係佢嘅老本行，佢加入政府前，曾任上市公司泰山石化行政總裁，去年仲做過俄羅斯鋁業主席添。
雖然青年會啱啱成立一年半時間，但係咁啱遇上特首選戰，一班小山東們齊為自己人助選，見證山東人揚眉吐氣嘅歷史時刻，可謂生逢其時。
梁紹莊望同鄉為港做實事
有份協助青年會成立嘅前山東商會副會長梁紹莊（Tommy）話，旅港山東老鄉有逾五十萬人，近年來港就讀嘅學生有增無減，希望將來凝聚老中青三代山東人嘅力量，為香港做實事。
卓妮