政情：波叔收租冇「父子價」
東華前總理鄧耀邦（Jason）今年未有冧莊做總理，原來另有生意大計，佢年內將會開設自然療法診所，就連舖位都租埋，揀咗爸爸「舖王」鄧成波位於灣仔嘅三千多呎地舖，每月租金要十幾萬元。雖然業主係爸爸，但租金冇情講，照跟足市價。
傳授做生意秘笈
波叔投資有道，囝囝搞生意，佢毫無保留過幾招，教兒子要（目及）實盤數，尤其診所有唔少現金過手，管理制度要嚴謹，免被人「穿櫃桶底」都唔知。雖然波叔錫Jason，但講到交租就絕無「父子價」。Jason話，爸爸係好實際嘅生意人，認為若然連租金都交唔起，證明盤生意做得失敗，要執咗佢，所以Jason事事認真，依家已集資二千萬元，除灣仔外，稍後會開其他連鎖分店。
讀中醫出身嘅Jason，對另類自然療法興趣濃厚，好似印度療法、藏傳療法、音頻療法，佢都接觸唔少，希望開店後可以學以致用喎。