政情：Greg蘇晒開心相 飛澳洲抱初生孫女
商務及經濟發展局局長蘇錦樑（Greg蘇）去年娶完新抱又嫁女，可謂喜事重重，估唔到佢咁快又傳出喜訊，就係佢喺澳洲做醫生嘅囝囝同新抱日前生咗個女，仲連英文名都改埋，叫做Caitlin。
Greg蘇開心做爺爺，梗係急不及待飛去澳洲抱吓孫女啦，佢前日仲喺社交網站上載咗一幅抱孫相片，笑到四萬咁口。
中澳混血 取名「純潔」
Greg蘇嘅新抱係澳洲人，去年三月先嫁入蘇家，估唔到咁快就幫Greg蘇生咗個中、澳混血兒孫女，仲改埋名叫Caitlin，即係「純潔」嘅意思。Caitlin出世時重八點八磅，絕對可以話係重量級女嬰。Greg蘇見到孫女肥肥白白，當然好開心啦。Greg蘇在社交網站貼相後，有接近二百個好友恭賀佢，睇嚟稍後預算案喺立法會進行二讀同三讀，Greg蘇都會笑笑口對住啲議員喇。