嘩嘩嘩嘩嘩，火燭呀火燭，鴨脷洲海怡半島發生四級火，燒到火紅火綠，導致五人受傷，你都咪話唔得人驚！
事發現場係海怡半島第十座十七樓一個單位，根據消防處嘅講法，昨日早上六時十二分接到火警報告，消防員動用兩條喉同四支煙帽隊灌救，經過三粒鐘搏鬥，最終喺九時二十一分將火救熄。消防處又話，消防員到場後發現大廈消防栓水壓不足，必須由地下引水上十七樓，延長咗救火嘅時間。
十萬火急生死攸關，因乜事幹消防栓水壓會不足嘅呢？消防承辦商就話嘞，可能係短路導致消防栓無法運作，消防系統於去年七月曾經年檢，昨日亦有季度檢查，正在了解確實原因喎。
唉，香港愈來愈多呢一類古怪事件，剛剛檢查完，即刻就失靈，跟住又係左了解右了解，了解到天荒地老都唔知發生乜嘢事。好似釀成九死三十四傷嘅花園街大火咁吖，消防處開始嘅時候講到似層層「有人縱火」，點不知查來查去都查唔到縱火狂徒係何方妖孽，經過一年零三個月嘅時間，寫咗百幾頁紙嘅報告，結論居然係起火原因不明。喂，你話花園街起火嘅原因係撞鬼都叫做有一個說法吖，起火原因不明喎，即係乜都查唔到，簡直浪費納稅人供養消防處嘅米飯，唔怪得連死因裁判官都鬧消防處失職啦。
講開花園街四級無情火，功夫茶真係餘怒未消。死因庭十五日研訊過後，裁定所有火災難胞係死於意外，死者家屬悲從中來猛咁話唔公道。死於意外等於無人負責，再加上一句起火原因不明，聽起上嚟真係佛都有火！
當然，死因庭照例提出一連串建議，譬如建議屋宇署嚴格執行同跟進消防安全指示，加強巡查劏房是否符合消防安全要求，提高罰則，加強對違例者嘅阻嚇作用。另外，死因庭又建議食環署加強巡查排檔，確保排檔遵從原有設置。至於消防處咯喎，死因庭建議加強前線搜救人員嘅資源。問題係，建議完又點呢？本地官場動物最常見嘅情況就係左耳入右耳出，建議接受，態度照舊。
即係咁，若然消防處積極做好監管工作，一切防患於未然，而唔係辦事粗疏得過且過，鴨脷洲海怡半島冇可能出現消防栓水壓不足嘅狀況，消防承辦商更加冇可能呢頭檢查完，嗰頭就故障。
總而言之，水壓不足難救火，監管粗疏必死火。如果消防處始終唔肯痛定思痛好好發揮監管作用，出事之後又傻頭傻腦查唔出起火原因，小心連政府總部都水壓不足而導致火燒後欄呀！