政情：賣舖勁賺八千萬 橄欖揸貨睇定啲
最近賣舖勁賺八千幾萬元嘅立法會「樓神」陳鑑林（橄欖），尋日同傳媒聚會時就繼續做樓股明燈，除咗分享自己投資之道外，仲教大家點睇股市狀況添！
佢話賣舖只係機緣巧合，但對於現時樓市情況，佢就話要睇定啲，認為政府推出嘅辣招，加上禽流感及國際局勢，只會對本港樓市帶來「小浪」，而真正嘅「大浪」要等幾年後，即政府嘅資助房屋逐漸落成，市場有足夠供應量嘅時候先會有顯著變化喎。
至於股市方面，橄欖就覺得最穩陣係買長線銀行股，而佢嘅心水就係一啲中資銀行股，因為勝在中國仲有好大發展空間，長揸五至十年，當儲錢嘅話，應該冇問題咁話。
強調第一桶金捱番嚟
不過，橄欖強調，佢嘅第一桶金都係要靠日捱夜捱，畀心機儲錢，再投資啲穩陣嘅股票咁儲番嚟。
雖然唔知橄欖依家仲有冇揸住股票，但佢透露手頭上仲有啲住宅同寫字樓，唔知佢又會等到幾時先出售再賺番一大筆呢？