政情：蔣麗芸反客為主 面懵卿姐被K.O.
白鴿黨立法會議員劉慧卿尋日邀請咗有「立法會元秋」外號嘅蔣麗芸（Ann）上佢網絡電視台做節目嘉賓，全程話題都係圍繞最熱辣嘅政改方案。不過，向來牙尖嘴利嘅卿姐唔知係咪被黨友「李漢奸」日前提出嘅短命政改方案搞到心神恍惚，全程被阿Ann反客為主，回答問題時經常篤正白鴿黨要害，搞到卿姐無言以對，被人寸到面懵懵。
話說尋日兩位阿姐一碰面就互相交鋒，當卿姐不斷問到點解白鴿黨黨員冇得返大陸時，阿Ann就反問：「你有冇回鄉證？」又叫卿姐去申請或到中聯辦查詢。卿姐就乘機投訴，自己成日示威到中聯辦都搵唔到人。阿Ann就答，去示威梗係不獲理睬啦，建議搵機會一齊入中聯辦搵主任張曉明問個明白喎。
猛篤白鴿要害
之後卿姐又問，點解有關方面只邀請建制派到內地會面，阿Ann又反問：「你都冇回鄉證，上去做乜？」又話港人一定好聰明，聰明到佢都要拍案叫絕，事關剛過去嘅特首選舉，白鴿黨何俊仁都有參選，但民調一直偏低。阿Ann仲話，只要白鴿黨理性咁坐低傾，一定有個大家都可接納嘅政改方案，「超級議員呢個功能組別咁難傾都被民主黨傾到，何況普選特首？」卿姐就咁被完全擊倒。