政情：趙式芝爆猛料 富二代男扮女裝
早前勇敢出櫃，宣布自己係女同性戀者嘅名媛趙式芝，尋日喺中文大學出席一個有關同性戀議題嘅講座時，話出櫃後有唔少人讚佢勇敢，有一位年輕富二代仲專登約佢食飯，話要多謝佢，點知出到嚟食飯時，呢位富二代竟然一身女裝打扮，而且仲要係扮得好靚嗰隻，趙式芝先明白原來對方都係一位同性戀者，但對方由於屋企背景問題，長期受壓唔能夠公開自己嘅性傾向，仲被迫要飛去外國扮讀書避世。
趙式芝又喺講座上透露，呢位富二代年輕有為，又好有才華，而且忍耐力亦好高，但只係因為佢嘅性傾向，就唔能夠獲得家庭接納，實在太過可惜。佢慨嘆香港人好睇表面，呢點好難改變，所以為咗多啲人認同同性戀者，自己會打扮得靚啲，起碼對方唔會喺外表上有抗拒。
周一嶽撈亂變性與同性戀
同場嘅仲有新任平機會主席周一嶽，有同性戀者喺台下質詢，問周一嶽到底有幾明白同性戀者，仲問佢知唔知咩叫跨性別歧視，點知周一嶽就自爆後生時曾經幫人做變性手術，所以好明白想變性嘅人到底諗乜。
周一嶽呢一番言論立即引起全場嘩然，令人質疑身為平機會主席嘅佢，好似唔知變性人與同性戀根本係兩回事。