政情：李漢奸衰到貼地
外號「李漢奸」嘅民主黨創黨主席李柱銘前日「露底」，提出二○一七年特首普選「跪低」方案，泛民主派乍見佢底線無極限，未談判先跪低，旋即狠批呢位所謂嘅「民主之父」。事隔一日，李漢奸忽然轉軚，開記招高調宣布收回方案，仲直認做法鹵莽，冇深思熟慮，但又口口聲聲話解釋唔到自己點解會老貓燒鬚。連當事人都話解釋唔到，咁邊個解釋到呢？可能睇番李漢奸尋日晨早到中環陸羽茶室密會壹傳媒肥佬黎可以估到箇中因由。
以後唔會「認」自己提出
尋日晨早未到七點半鐘，肥佬黎獨自現身陸羽茶室，約半小時後，李漢奸忽然再現身進入陸羽。兩人逗留一個多鐘頭後，前後腳步出門口，肥佬黎仲載埋李漢奸返屋企，然後自己先至返屋企，其後就忽然傳出李漢奸會喺下午三點鐘開記招。李漢奸喺記招上話，喺早上決定道歉後，「心情舒服好多」，佢仲話有位民主派嘅朋友提醒佢：「李柱銘，你鍾意唔鍾意（都）好，你係唔可以有個人意見」。唔知呢位民主派朋友係咪肥佬黎呢？
李漢奸聲稱決定道歉心情舒服好多，但談判底線率先露底，損害已成，泛民對普選議價再加障礙。李漢奸自言未睇到今次自揭底線嘅傷害，但佢期望將傷害減到最低，又話今次收回方案，以後唔會「認」方案由自己提出，吓，原來講過嘅嘢可以唔認，真係你講晒喇。不過，佢轉頭又話將來如果有其他人覺得意見可取，亦可再提出，因為「（方案）唔係收回就會毀滅o架嘛，因為個意見仲喺度，就算你張紙燒咗都仲喺度」喎，講到自己個方案好似廢物循環再用咁，真係唔知佢想點。
疑似「瞓醒」嘅李漢奸除咗同泛民朋友道歉外，亦不忘對一場歡喜嘅一班左派朋友道歉，為自己收回決定，「無法子面面俱圓」致歉。但工聯會王國興就覺得李漢奸出爾反爾，仲質疑泛民連李漢奸少少意見都容不下，即係一啲都唔民主喇。而前日公開表揚李漢奸務實嘅民建聯主席譚耀宗話冇諗過李漢奸身為大律師講嘢會咁兒戲喎。分屬黨友嘅民主黨主席劉慧卿就話，希望大家從今次「最短命方案」中吸取教訓，講意見前要先問吓大家，一於冇面畀。