中環出更：「平買」青花瓷 黃經國high爆
匯聚工商界老闆嘅理工大學總裁協會（CEO Club），早前喺協會副理事長黃經國（Raymond）嘅清水灣寓所，搞咗場古董投資分享聚會，理大校長唐偉章、協會理事長兼「假髮大王」趙振國等近四十人齊去開眼界。志在參與嘅唐偉章自言對古玩冇研究，小時候只試過收藏郵票，現時公餘最大嘅興趣就係踩單車，假期經常喺大埔踩單車減壓。咁投入綠色生活，難怪政府委任佢做綠色運輸試驗基金主席喇！
古玩價愈搶愈高
Raymond醉心收藏古董，多年累積嘅收藏繁多，有瓷器、銅器、古玉及絹畫等，但最愛始終係瓷器。多年前，佢因為選購風水擺設而進入古玩世界，自此一發不可收拾。講到買得最開心嘅一次，係最近喺香港投得清雍正翼龍紋青花瓷，最開心係只花幾百萬元就買到價值幾千萬元嘅心頭好。佢仲話，全世界競投古董最貴嘅地方就係香港，事關愈來愈多內地買家加入搶購，內地同胞連奶粉都搶到貴晒，何況係古玩？
