中環出更：葉澍堃帶隊 印度為食遊
馬會大董葉澍堃（Stephen）夫婦早前趁住復活節假期，與佳能香港副總裁鄧慶治、「快勞夾大王」杜振源夫婦、立法會議員梁君彥夫婦等十多位老友，同遊印度金三角及新加坡，途經印度首都新德里、泰姬陵所在地阿格拉及「粉紅城市」齋浦爾，騎大象兼尋找隱世美食，玩足五日至返港。
Stephen大讚印度風景如畫，酒店同建築物都充滿藝術氣息，同行老友石禮謙就最欣賞新加坡街道兩邊開滿餐廳，兼有唔少樂隊喺街頭賣藝獻唱，令遊客感受到當地熱鬧嘅一面。加上新加坡人親切友善，英語水平又高，反觀香港最具代表性嘅就只有蘭桂坊，係時候要諗吓點樣改善旅遊質素喇。
歎超巨型手拉薄餅
去得印度，又點少得歎當地馳名嘅咖喱呢！佢哋此程就去咗新德里一間酒店內嘅傳統印度餐廳Bukhara，美國前總統克林頓、滾石樂隊靈魂人物Mick Jagger等唔少國際知名人士都係呢度嘅熟客。餐廳嘅招牌菜係手拉薄餅Naan，特別之處係超級巨型，足足有成張枱咁大，要三個人合力先至拎得起，叫一塊已經夠晒一行十幾人食，蘸上咖喱同吃，味道非常可口。
去到齋浦爾，佢哋又去咗Rambagh Palace酒店內一間尊貴嘅餐廳醫肚，呢間酒店前身係王宮，所以餐廳仲保留住宮廷式長枱，服務態度一流之餘，食物質素都有番咁上下，食到個個都舔舔脷。
卓妮