中環出更：黃雨無阻啟剛晶晶行善
香港青年聯會及屬下賢慧社主辦嘅「青聯賢慧愛家日」活動，尋日朝早喺黃色暴雨警告下舉行，但大雨無阻青聯常務副主席霍啟剛同擔任活動大使嘅霍太郭晶晶嘅參與熱誠，其中晶晶喺開幕式與台下幾百位來自低收入家庭嘅小朋友，分享昔日喺國家隊跳水集訓嘅點滴，聽到小朋友津津有味。唯一可惜嘅係，大雨令開幕式被迫由可容納上千人嘅室外場地移師室內，令部分小朋友無法親眼一睹晶晶嘅國寶風采，惟有湧去熊貓館睇另類國寶補番數。
上纜車拍拖「事敗」
賢慧社主席羅詠詩（Anthea）爆料話，當大家準備入場時，啟剛仲以為可以同晶晶一齊拍住拖坐纜車上山，但其實海洋公園喺幾年前已整咗架海洋列車直通去海洋劇場，反映啟剛已經好耐無去海洋公園玩。今次一齊去行善嘅仲有青聯主席葉振都、全國青聯副主席陳仲尼等人。