中環出更：孻女搵到好歸宿蕭炎坤笑晒
博愛醫院前主席蕭炎坤（Sidney）嘅孻女蕭文玲，早前下嫁喺金融機構工作嘅陳卓鋒（Lincoln），數百名親友及政商界老友都去沾喜氣，包括前立法局主席黃宏發（發叔）、博愛主席曾耀祥、前博愛主席藍國慶夫婦、稻香集團主席鍾偉平及華懋集團執行董事李家松等人。一對新人係基督徒，當日朝早先喺教堂行禮，然後移師尖沙咀酒店舉行西式婚宴，婚禮勝在簡單溫馨。三名仔女都已成家立室嘅Sidney，見證細女覓得好歸宿，成日開心到笑不攏嘴。
新郎哥Lincoln盛讚太太又靚又乖，亦好有愛心，事關太太係中學英文老師，對學生好好，咁好嘅老婆好難搵，所以拍拖兩年就決定拉埋天窗。做過博愛總理嘅蕭家大仔蕭文豪（Simon）及太太顏嘉（Mary）、大女蕭文麗及老公都嚟幫手招呼親友，文麗嘅囝囝着到官仔骨骨做花仔，好得意。Simon同喺跨國金融機構工作嘅Mary已育有一名兒子，Mary話，囝囝依家一歲幾，半夜經常起身，照顧佢已經好辛苦，暫時未敢考慮追多個。
發叔湊孫好滿足
鍾意摸酒杯底嘅發叔，席間同老友飲酒暢談，好盡興。佢話退出政壇後專注英譯唐詩，得閒就同家人周圍去玩，早前去日本浸溫泉，跟住又同太太、女兒、女婿及一歲半嘅外孫暢遊台灣，台灣之行最令佢開心嘅竟然唔係食物及人文景色，而係做湊孫公。因為有日阿女同女婿要參加台灣朋友婚宴，唔方便帶埋BB，發叔同太太就幫手湊孫，好滿足。咁佢有冇留意近排嘅中港政治話題？發叔話，梗係有，仲有好多意見添，但如果同卓妮講就唔可以講得太盡，乾脆唔講喎！
卓妮