政情：派報唔知碇 譚Sir燒鬚
立法會議員譚耀宗（譚Sir）尋日率領多位黨友，到中環畢打街向市民派發佢哋最新一期黨報，原本都幾有陣勢，可惜佢唔知碇，企咗喺一個報紙檔前面，結果被檔主鬧佢阻住做生意。譚Sir今次老貓燒鬚，但黨友蔣麗芸（Ann）同葛珮帆（EQ）就施展笑容攻勢，派完一疊又一疊。
阻住報販做生意捱罵
話說譚Sir尋日負責嗌咪，可惜佢把聲太過沉悶，聽落似催眠曲多啲，後來換上聲如洪鐘嘅阿Ann嗌咪後，嚇到大家當堂醒晒。有阿Ann落力宣傳，譚Sir就安心四出派黨報，點知佢好企唔企，企正喺報紙檔前面，搞到檔主忍唔住開聲鬧佢︰「企過啲派吖嘛，阻住做生意呀！」譚Sir惟有面懵懵行開啲。經過選舉、見慣街坊嘅阿Ann同EQ就出動笑容攻勢，全程四萬咁口對住趕食晏嘅上班一族，結果就派完一疊又一疊，成績不俗。