政情：鐵頭仁涂謹申爭做懶蛇
隨着新一屆立法會展開，過去會內嘅「四大懶蛇」亦改朝換代，勢必由成功連任嘅鄉議局主席劉皇發組成「新四大懶蛇」。據部分立法會議員觀察及分析所得，估計醫學界「怪醫」梁家騮同地產及建造界石禮謙（大舊石）好大機會成為「新四大懶蛇」成員，另外亦留意到兩名超級議員何俊仁（鐵頭仁）同涂謹申都有機會跑出，係真係假相信好快揭盅。
每逢每個立法年度結束後，有監察立法會嘅團體都會為一眾議員進行考勤報告，睇吓佢哋過去一年出席率如何。據聞有部分議員今年都關注呢個考勤報告，事關過去人所共知嘅「四大懶蛇」發叔、前中總代表黃宜弘、前金融界李國寶同體育界霍震霆，每年都輪流被批評唔開會，咁樣被人點名批評真係瘀到爆。
怪醫大舊石出席率亦低
不過，立法會換屆後，「四大懶蛇」之中除咗發叔連任外，其餘三個都「被勸退」或棄選，勢必有人「替補」頂上。據聞立法會部分議員曾私底下討論「新四大懶蛇」嘅可能人選，其中一致認為發叔係「鐵膽」，主因係發叔有「懶蛇」往績可尋，另外三個「新懶蛇」亦好大機會係由議會舊人瓜分，料梁家騮同大舊石好大機會上榜。
首先「怪醫」行蹤一向神龍見首不見尾，除咗業界議題外，幾乎外人都好難估到佢會關心其他咩議題，更遑論佢會否坐定定出席會議投票，所以好多人都估計「怪醫」係高危人士。另一熱門「懶蛇」人選係大舊石，有分析認為佢過去出席率都係麻麻地，依家冇咗小霍等人墊底，估計佢今次都係難逃入伍喎。
至於「四大懶蛇」末席，議員之間眾說紛紜，有人預言人選係來自泛民主派，首推本身係「雙料議員」嘅鐵頭仁同涂謹申，主因係議會工作重疊搞到顧此失彼，認真信不信由你。不過，距離年度考勤仲有四個月時間，一眾「大懶蛇」如果有意洗心革面仲嚟得切，否則到時榜上有名，餘下三年任期就要孭住「大懶蛇」或「大懶蟲」呢個稱號。