金融界一直有傳聞，特首梁振英有意效法新加坡，成立「港式淡馬錫」大搞主權基金，主動投資各地基金同股票，不過到現時都只聞樓梯響，未有實質措施出台。咁樣反而令一眾負責財金嘅官員鬆一口氣，因為唔少官員都認為港式淡馬錫只屬「吹水」性質，實際上根本行唔通，如果夾硬成立只會有反效果。
行唔通嘅原因有好幾個，有官員相信政府嘅投資眼光，無可能夠市場人士準確，港式淡馬錫如果炒燶股票，一定引起市民反彈。第二原因係港式淡馬錫一旦投資公共事業，例如大眾運輸或者電力，咁政府一加車費或電費都會畀人鬧，唔加亦保持唔到競爭力，何苦？
基於同一原因，官場中人覺得由政府揸莊做強積金管理人嘅建議，都係完全唔可行，因為政府唔會有強積金銷售員，同其他強積金管理人搶生意，所以無可能同市場同步競爭，除非全盤由政府接管，但一旦投資失利，又會畀市民鬧爆。