政情：Jack蘇愛拍低成本電影
經濟發展委員會尋日首次開會，相信大家都好想知道呢個高層次、跨界別、跨部門嘅平台究竟係點嘅呢？身為主席嘅特首梁振英（CY）就邀請傳媒喺開會前參觀同影相，原來高層雲集開會前首先要決定開會語言同埋自我介紹，分享嗜好。
咪以為自我介紹呢個環節好無聊，事關某程度可以反映個人自我認識，好似委員之一嘅工業界立法會議員梁君彥就話，佢係一個半職議員。佢之後解釋，自己唔係全職議員，所以咪係一名半職議員囉，咁唔知佢係咪出半份糧呢？
為咗令委員之間有較全面嘅認識，CY喺各委員自我介紹時都會講番一兩句註解，當「梁粉」劉炳章介紹自己時，CY仲忍唔住要介紹佢有份成立嘅香港專業聯盟，搞到等緊做自我介紹嘅貿易發展局主席蘇澤光（Jack蘇）好似有啲尷尬，好彩Jack蘇都有機會同大家分享自己嘅嗜好，原來佢最鍾意拍一啲低成本嘅電影。