座位亮綠燈 表示收緊音
保險界陳健波就對此感到大惑不解，唔明點解自己明明冇要求發言，但個咪就無啦啦畀人調校到有聲。但有建制派議員就同佢講，當時大舊行近，附近所有咪都着晒綠燈，即係全部收晒音，健波醒目發現，所以無亂講嘢。
陳健波向秘書處了解情況之後就話，原來當有議員離位發言時，為咗令記錄會議嘅職員清楚知道該位議員講緊啲乜，秘書處一般會開着附近議員啲咪，但就可能會殃及池魚，連累其他議員嘅對話都公開晒。據聞立法會秘書長陳維安已經派人喺每位議員嘅座位前貼上告示，提醒議員綠燈亮起代表收緊音，等佢哋唔好再喺開着咗嘅咪前面亂講嘢。