政情：乳癌過來人 嫻姐反思
立法會議員陳婉嫻○三年曾經確診患乳癌，好番後，十年來佢不時就抗癌過程現身說法。不過佢最近對自己患癌有新嘅反思，佢話，自己當年嘅生活違反晒自然定律，上天要懲罰佢所以患癌，依家已經以另外一種態度生活。
乳癌康復者嫻姐提番起十年前，知道自己患癌一刻，心情好難平復：「知道自己患上乳癌後，返到屋企對住部電視呆晒。」佢話自己一直都好糊塗，到依家都唔肯定當時乳癌一期定二期。
嫻姐將當年患癌嘅原因，歸咎於自己嘅生活模式，佢當時都係立法會議員，因為好忙，所以食無定時，又長時間歎冷氣，諗番轉頭，違反晒所有自然定律。又因為工作關係，經常都好唔開心。嫻姐認為上天為咗懲罰佢不斷虐待自己，決定畀啲考驗佢。佢患病好番之後，為咗保持心境開朗，每日都會同心愛嘅花花樹樹見吓面，咁樣情緒都會穩定啲，個人都開心啲。
感激范太當年關心
佢又特別多謝同樣患過乳癌、時任立法會主席嘅范徐麗泰，佢話范太開會嗰時見佢面色唔多好，介紹佢飲五菜湯，到依家佢都記住。