政情：CY移師大堂放話
尋日特首辦公布咗一項行政會議採訪嘅新安排，表面上話要「方便傳媒採訪」，但實際上係對傳媒走位嘅極限挑戰。聽聞係因為特首梁振英（CY）放話嘅聲量，無法蓋過門外嘅請願人士，所以有呢個安排。
CY逢星期二開行會前會先招呼特首辦門外嘅一班請願人士，然後轉過靚身，透過傳媒向全港七百萬市民放話，而各位專業嘅請願人士亦都好識把握機會，趁CY講嘢時高舉橫額做布景板。
採訪要兜圈先入到去
話說前排因為請願人士高叫口號，聲量蓋過CY，CY之後就話現場「太嘈」，無答記者問題就轉身而去，據聞就係因為咁，所以就有新安排，CY喺門外接完請願信，先行入特首辦地下大堂放話，以便傳媒採訪。
不過問題就嚟喇，需知道添馬艦對咩人用咩門口出入有嚴格規定，CY接信後就話可以用特首辦正門入大堂啫，但傳媒就兜圈要走後門先入到去，淨係計步程都慢幾秒，仲未計有電視台攝影師要勞師動眾搬晒啲器材入室內喎，所以呢項「方便傳媒採訪」嘅新安排絕對係對傳媒一項挑戰。