中環出更：施榮忻身教 父女檔賣旗
良好習慣要從小培養，菁英會榮譽主席施榮忻（Jaime）都經常以身作則教育下一代，更帶埋三個寶貝仔女參與各類型慈善活動。卓妮就喺上周六遇到Jaime同讀緊小學四年級嘅大女Victoria，父女檔現身銅鑼灣街頭，落力向途人賣旗。Victoria初時有啲膽怯，Jaime就從旁教授技巧，仲教佢無論途人買旗與否，都要保持禮貌，微笑講多謝。
訓練囡囡主動關心社會
有爸爸教路，Victoria即時信心大增，表現愈來愈淡定，最後仲成功賣咗兩版貼紙旗添。卓妮上前同Jaime打招呼，原來佢話大女已經係第二次賣旗，對上嗰次係小一。Jaime話，佢一向都好鼓勵囡囡親身參與慈善活動，事關可以訓練到囡囡嘅責任心同膽量之餘，更主動關心社會事務。
Jaime笑言，賣旗期間遇到唔少內地旅客，幸好Victoria普通話不俗，唔少同胞都慷慨解囊。雖然Victoria最後都賣唔晒疊貼紙旗，亦遇過途人拒絕買旗，但Jaime同囡囡講，結果並唔重要，盡咗力去做就得喇。
卓妮