政情：廢腑之言：枉打基層工財爺「曾」麻木

自從財政司司長曾俊華「冒認」中產，仲話中產最愛飲咖啡同睇法國電影，大家已經覺得呢個財爺語無倫次。尋日鬍鬚曾再次喺佢網誌亂講，佢話自己做過基層市民，當年喺美國讀大學時，暑假就去做建築工人，專幫樓盤做室內裝修。最難忘係拎住塊七十磅嘅石膏板，由地面逐層逐層搬到樓上。

鬍鬚曾又話，畢業後試過喺老人中心打工，由洗地、送飯都要做，之後仲去過學校教書，輾轉回港先加入政府。不過可惜嘅係，鬍鬚曾打過咁多份基層工，到現時都唔知民間疾苦，食嘢唔知米貴，如果佢知道基層有幾大負擔，明白佢哋活喺水深火熱之中，預算案就唔會一味得一次性措施，亦唔會豪花幾百億投放喺無急切需要嘅基金身上啦。

第一手消息請下載on.cc東方互動iPhone/iPad/Android/Windows Phone Apps