要做官，當然要熟讀所屬政策局範疇嘅政策，不過原來除此以外，仲有啲資料係非懂不可，講緊嘅係一大堆涉及人名、職位同用語嘅縮寫，因為呢個基本係政府內部嘅共通語言，否則同政府同事根本係「雞同鴨講」。
有知情人士話，呢一大堆縮寫基本上係政府內部通用，開會同文件嘅行文都會用到，好似各政策局都有縮寫稱呼各級官員，所以唔識嘅話根本唔知邊個打邊個。
另一方面，依家好多政策都屬於跨部門共同推動，所以要熟知十多個政策局嘅縮寫，就好似政制及內地事務局英文縮寫係「CMAB」，民政事務局嘅縮寫係「HAB」等，幾乎已經成為政府官員最基本嘅要求。
要將呢啲「入門」集中起嚟編成一本「手冊」，原來有成八頁紙咁多，當中加埋日常溝通常用嘅縮寫，好似代表for your information嘅「fyi」，as soon as possible嘅「asap」等供佢哋參考。
話時話，梁振英成日都話，新政府會秉持「成熟一項推一項」嘅原則推出政策措施。唔知政府內部會不會統一番個英文縮寫畀呢個用詞，等大家有得依循作內部通傳之用呢？