政情：貪曾流氓扮皇帝
沙士十周年，新沙士出現。不過沙士以外，香港近年嘅「抗疫史」仲有○九年嘅豬流感，近日官場中人重溫豬流感一役時就發現，當年嘅「戲劇性」絕對不遜於沙士，之唔係因為有佢——貪曾曾蔭權囉。貪曾喺任內乜都唔做，以為自己做緊皇帝，睇完下列兩個例子，就清楚不過嘞。
○九年五月一日，貪曾宣布香港出現首宗確診人類豬流感個案，仲史無前例將病人入住嘅酒店封鎖，同時宣布親自領導一個跨部門應變督導委員會抗疫。不過，傳聞督導委員會頭一兩次開會就唔多愉快。話說有次貪曾喺開會前，見到有記者在場外守候，一入到會議室就大發雷霆咁問點解外面有記者，仲眾目睽睽成個file揼落枱面，拋低一句「你哋開啦，我唔開喇！」就轉身離去，搞到在場人士你眼望我眼，唔知點算好。
「你知唔知自己同緊邊個講嘢」
不過講到最經典，都仲係佢嗰句「Who do you think you are talking to？」（你知唔知自己同緊邊個講嘢？）雖然呢個跨部門小組嘅成立，係為要廣納同統籌不同意見，但傳聞當年貪曾開會時講得最多嘅就係「唔得！」、「唔好！」同「唔做！」總之啱聽個句就聽，唔啱聽個句就半句都唔入耳，搞到唔少公務員都好谷氣，極沮喪。喺一次特別會議上，出席嘅都有幾十人，時任食物及衞生局常秘李淑儀曾因直諫不果，反而被貪曾擺架子大罵一句「你知唔知自己同緊邊個講嘢？」最後搞到要同場嘅一位司長出嚟打圓場，而時任食衞局局長、平時開會都好少講嘢嘅周一嶽，就繼續沉默隔岸觀火。
呢句對白，會後喺公務員之間廣傳開去，個個都聽到擰晒頭，齊齊話：「佢以為自己係皇帝咩？」
新沙士喺十年後嘅冬末初春爆出，雖然新沙士仲未傳入香港，但就搞到人人都杯弓蛇影，虛假訊息滿天飛。不過講到抗疫經驗，其實我哋一啲都唔輸蝕，我哋仲係貪曾曾蔭權爵士主政，喺佢發脾氣、揼文件、拒開會嘅情況下，仍然可以成功對抗○九年嘅豬流感，所以香港人其實唔使咁驚﹗