中環出更:靚袋失而復得蔡加敏笑番

「玩具大王」蔡志明長女蔡加敏(Carmen)尋日同老公馬鴻銘拍住拖入沙田馬場湊熱鬧,Carmen開設嘅名手袋店日前遭「快閃賊」爆竊,險失價值五百萬元嘅靚袋,佢話當時都好擔心會損失慘重,幸好警方極速搵番晒啲贓物,笑言要畀香港警隊十個叻。

受過教訓 加強店舖保安

Carmen舖頭一批名媛熱烈追捧嘅「袋中之王」最終失而復得,佢心情靚晒,尋日拎住私家名貴手袋搶鏡。佢話經此一役,店舖會進一步加強保安,以防案件重演。又再懷有六個月身孕嘅Carmen早前舉家去新加坡及馬來西亞玩,去咗Legoland參觀,平時少玩積木嘅大女靄翹都玩得好盡興。Carmen又話一對孖仔誠禧同瑋禧精力旺盛,周身郁冇時停,將來打算畀囝囝學跆拳道強身健體。

海皇粥店集團執行董事蕭楚基(CK)都有入場,撐佢有份嘅團體馬「黃金年代」,雖然跑得梗頸三,有錢分一樣開心。CK大爆集團將開拓西餐路線,首間分店於年中坐落東涌,主打休閒歐陸風格,冀吸引飲咖啡嘅中產客喎。

第一手消息請下載on.cc東方互動iPhone/iPad/Android/Windows Phone Apps