政情：周大福億元捐清華
周大福慈善基金日前捐贈人民幣一億元予清華大學法學院，尋日喺灣仔會展中心舉行「清華大學鄭裕彤法學發展基金」簽約儀式。身為清華校董嘅周大福慈善基金名譽理事長鄭家純喺儀式上話，家族一直深信法治係社會繁榮與穩定嘅基石，要令社會得以平衡發展，法治同法學教育對國家發展尤其重要。
對中國法治建設有意義
清華大學校長陳吉寧都親身嚟到香港，佢話衷心感謝鄭家純一直以來不遺餘力支持大學發展，佢形容今次合作係一次理想信念嘅融合、心與心嘅合作，對清華法律學科嘅建設、清華長遠嘅戰略發展，乃至對中國嘅法治建設、長治久安及繁榮穩定，都有重要意義。
尋日同場亦舉行港大法律學院與清華法學院合作交流發布會，雙方簽訂交流備忘錄，更宣布港大清華法學交流顧問委員會成立。出席嘅嘉賓有周大福慈善基金理事長鄭家成、港大校長徐立之，及律政司前司長梁愛詩等。