中環出更：李家仁訂造小明手機殼
兒科醫生李家仁唱紅「小明」系列兒歌之後，擁有無數忠實擁躉，早前佢出席一個新春酒會時，吸引好多女士排隊同佢影相，成個明星咁款。我哋發現佢嘅手機殼好得意，細心一看，原來印有Ｑ版小明公仔，輪廓同佢倒模咁相似。李家仁話，小明周邊產品好受歡迎，但係佢未得閒分身開拓商機，只係最近貪得意訂造十一個手機殼送畀親友。點解唔做多啲？佢笑笑口話，怕手機款換得太快，唔環保喎！
新歌與國教有關
講起小明嘅近況，李家仁爆料話，小明最近去咗北京探阿爺，又突然鍾意慳水。佢解畫話，阿爺住喺北京，唱呢首歌嘅目的係想話畀反國民教育嘅市民聽，阿爺好親切，唔使怕。仲話《小明探阿爺》已錄完音，但仍未公開發表。至於小明愛慳水嘅歌詞仍在構思中，目的係想喚起大家珍惜水資源，事關水資源缺乏係全世界嘅問題，港人都唔可以置身事外喎。
卓妮