冇駁公用渠 亂收排污費

渠務署現正於大埔林村谷廿七條鄉村興建污水收集系統，其中包括新屋仔村的首個公共排污系統。在該村居住近十年的陳先生近日接獲水費單，無意中發現單據上列明需收取排污費，「排污渠依家仲起緊，咁快就收排污費？」

陳因心生疑惑，遂翻查過往水費單，竟發現原來一早已有此項收費，經向鄰居了解，亦證實部分村民多年來一直白白繳交排污費，「都唔知仲有幾多人、幾多條村無端端畀人收錯錢！我哋要畀錢清理化糞池，又要畀埋排污費，仲要畀足咁多年，真係冤枉！」陳不滿政府誤收排污費，要求調查及退還多收款項。

誤收事件被揭發後，渠務署已陸續去函受影響用戶通知退款安排。

為改善鄉村排污系統，渠務署已先後於多區的鄉郊興建污水收集系統。

市民遇懷疑須查詢

「用者自付，冇用就唔使交，點可以收多人哋錢？」大埔區區議會環境、房屋及工程委員會委員鄧友發指出，因應接連有居民發現被多收排污費，渠務署應作全面檢查，盡快堵塞漏洞，並聯絡受影響住戶主動安排退款，「雖然每個月收錯嘅錢唔係好多，但係小數怕長計，巿民自己真係要提高警覺，睇清楚張單先畀錢！」

居民點睇 吳先生：「平時比較忙，好少詳細留意水費單，真係分分鐘被收多錢都唔知！」

陳太：「就算每季收多一百幾十，收埋收埋都好襟計，如果畀佢（渠務署）收多錢一定要追番！」

立法會民政事務委員會委員王國興更直言，不排除事件只屬冰山一角，促當局從速糾正錯誤，「始終服務對象係全港巿民，就算只係小數目、小錯誤，影響都可以好大！」王又鼓勵巿民遇有懷疑須主動向渠務署查詢。

當局發函認衰退款

渠務署發言人指出，當用戶在水務署開立帳戶時，渠務署會透過電腦系統識別有關用水地址是否已接駁公用污水渠，以確定是否需要收取排污費，因部分用戶登記帳戶時所輸入地址格式與該署系統紀錄不符，導致未能區分。

發言人續稱，去年十一月接獲林村谷新屋仔居民查詢排污費事宜，證實有關單位仍未接駁至公共污水收集系統，毋須繳付排污費，遂更新紀錄並安排退款。當局亦已檢視資料系統以找出同區其他問題帳戶，並會陸續致函受影響用戶致歉及通知退款安排，預期於下一期水費單發出前可安排所有退款。

記者：朱廣華

攝影：伍思明、何穎賢