《信報》主筆練乙錚早前撰文話特首梁振英（CY）「涉黑實可雙規」，引發CY向《信報》發律師信，最終搞到《信報》發出道歉聲明，點知該報總編輯陳景祥一個屈尾十又話，道歉對象係讀者，並唔係梁振英。
原來事實係《信報》同CY就聲明字眼多次以律師信往來，最後《信報》得悉CY對聲明收貨，先拍板刊出含道歉字眼嘅聲明，所以大家係傾掂數解決事件。
尋日有報道爆料話，原來CY發畀練乙錚嘅律師信中，末段花上大量篇幅解釋咩叫「雙規」，而二月初CY發信後，並唔係就咁算數，CY嘅律師曾經同《信報》律師多次書信往來，經過數次磋商傾掂數後，《信報》決定喺聲明中含有道歉字眼，而有傳呢個決定經由《信報》主席陳慶祥直接拍板而出街，聲明出街前亦畀過練乙錚過目。
如果報道屬實，即係暗示緊《信報》同CY一直就聲明字眼「講數」，講到雙方都收貨為止，先肯畀聲明出街，證明咗當日《信報》刊登道歉聲明後，雙方又各自表述唔同理解，《信報》話係向讀者道歉，而CY就話接受對方道歉，原來係一場早已寫好嘅劇本囉。