政情：蔣麗芸聲大有段古
今屆立法會新人王，一定非民建聯蔣麗芸（阿Ann）莫屬，佢入咗立法會只係短短半年，已經成為網絡紅人，憑住佢惹火性格同無人能比嘅「聲浪」，淨係娛樂性已經係眾議員之冠。阿Ann話講嘢咁大聲，自己都唔想，因為呢樣嘢係與家族有關，但唔係講緊家族基因影響，而係由細到大都被迫訓練到大聲講嘢至有人聽到。原來阿Ann「大聲之謎」有段咁嘅歷史。
講嘢細聲 冇人聽到
佢話蔣家有六個女，自己雖然排行第二，但喺家中作風一向猶如大家姐，講嘢太細聲，其他姊妹根本聽唔到佢講乜，所以佢由細到大都慣咗講嘢大聲啲。呢個論點都幾得意，唔知阿Ann其他姊妹講嘢係咪都咁大聲呢？
講起大聲，最經典一幕當然係佢早排同社民連主席梁國雄喺議事堂內「互片」一事，講番起呢件事阿Ann都好勞氣，話其實香港人忍咗長毛太耐，而佢自己已經忍唔到，先同長毛開火。阿Ann話同長毛做咗幾個月「同事」，唔怕畀佢激親，因為長毛只係一名唔聽話嘅細路仔，遇到唔啱聽說話就發爛渣，不過阿Ann話唔諗住「教仔」，話等選民自己選擇。