政情：蛇年施政好難過
蛇年伊始，尋日我哋講過部分立法會議員嘅蛇年運程後，今日輪到批算一眾高官運程，總括而言都係好壞參半，特首梁振英（CY）蛇年「難有難過」，並因「忌神出現」，難以展現才華。至於有份為新政府「寸土必爭」嘅運輸及房屋局局長張炳良更被批農曆七月、八月「必有負面大事」，而環境局副局長陸恭蕙更喺農曆五月、六月「必有大震撼」，莫非暗示新政府施政困難重重？
香港術數家協會術數師楊子東話，CY上任至今七個多月，面對爭議問題不絕，呢個困難局面將延續至蛇年，事關從CY八字中嘅年、月、日三柱睇到，「CY大運戊寅，火生旺戊土，忌神出現，更加難展現才華」，所以蛇年「難有難過」，農曆正、二月勉強過到，五、六、九呢三個月不順，尤以七、八月最差，要去到冬季先平穩。不過，到二○一四年甲午年，CY生肖伏吟，到夏天「土旺」難題更多，甚至出現更大危機。
張炳良「必有負面事」
新政府視解決房屋問題為重中之重，有份參與建屋大業嘅張炳良蛇年運程未許樂觀，皆因佢「官星大波動」，農曆七、八月「必有負面大事」，到農曆十一月會更差。同樣運程麻麻嘅仲有環境局副局長陸恭蕙，楊師傅形容佢「遇強更強」，農曆三、四月平穩中帶憂患，之後農曆五、六月「必有大震撼」，冬季農曆十、十一月更有「大難關」，幾乎個個月都有事發生。
鬍鬚曾要注意健康
被視為港府大掌櫃嘅財政司司長曾俊華（鬍鬚曾），楊師傅就提醒佢喺農曆五月、六月要注意健康；而半途出家做官嘅政制及內地事務局副局長劉江華就要留意「冬季有大反差，農曆十一月最差」。
不過，去年被楊師傅批中「依然有本錢，可以繼續強硬」嘅政務司司長林鄭月娥，展望蛇年聲望會更高，七月、八月必有佳作，唯一要注意嘅係正月同二月有大壓力，易出錯且受同事拖累，去到農曆十一月「忌神出現必有大煩惱」，好彩之後難題都會得到解決。不過都係嗰句啦，八字運程嘅嘢「信則有，不信則無」。