中環出更：黃思詩向貧困自閉童援手
提起溫州人，相信大家第一時間諗到做生意好叻，但溫州同鄉會青委常務委員黃思詩（Cece）就向專業發展，取得美國言語治療師專業資格，早前自立門戶喺尖沙咀開設康復顧問中心，專注幫助自閉兒童，仲籌謀為貧困家庭嘅自閉兒童伸出援手，愛心十足。
即將做香港新抱
Cece由美國來港定居未夠兩年，單身靚女嚟香港打天下，一啲懼色都冇，原來佢即將做香港新抱，男友係浙江省同鄉會聯合會（浙聯會）青委成員蔡相理，即係浙聯會副會長兼偉光鑽石老闆蔡俊遠嘅公子。
Cece話，受到互聯網及智能手機影響，香港小朋友社交能力普遍下降，自閉個案亦愈來愈多，可惜普遍家長認知唔普及，往往錯失治療嘅最佳時機。為咗幫助低收入家庭及時求醫，佢正與有關機構商討，合作為貧童伸出援手。