中環出更：施榮忻 馬清揚煮場我話事
時下愈嚟愈多事業型男士鍾意走入廚房煮嘢食，卓妮之前講過菁英會榮譽主席施榮忻（Jaime）鍾意入廚外，原來大生銀行家族後人馬清揚都係同道中人。卓妮早前就分別見到佢哋兩個「住家男人」現身中環ifc一間超級市場精挑細選食品，見佢哋喺貨架前行咗幾圈，眨吓眼就裝滿一籃子美食。莫非佢哋都諗住同老婆撐枱腳，親自下廚煮番個愛心晚餐？
有日傍晚時分，卓妮見着住西裝嘅Jaime，一支公喺超市邊行邊睇，見到啱心水嘅貨品就放落購物籃，包括冇添加賀爾蒙激素嘅法國走地黃油雞、即食紫菜、加拿大海膽、荷蘭黃燈籠椒等，都係健康有機嘅食材。卓妮上前同Jaime打招呼，佢話為咗家中小朋友健康，要嚴選食材，特別係雞肉，買不含賀爾蒙嘅比較安心。至於即食紫菜，佢就話係買嚟同老婆坐喺梳化煲電視劇嘅時候食喎，認真溫馨。
咁啱得咁蹺，一日後卓妮行經同一地點，又遇到一身休閒打扮嘅馬清揚帶埋工人去掃貨，不過就唔見佢嘅前港姐太太錢慧儀。
睇準目標 掃貨夠快手
當日佢孭住個斜孭袋，好有目標咁行，短短數分鐘，就極速掃咗意粉、新鮮香草等食材，跟住佢叫工人排住隊先，自己就爭取時間行埋附近嘅貨架。行到條隊差唔多到嘅時候，佢先至返埋位畀錢，之後就同工人分道揚鑣，一個人繼續行商場喇。
卓妮