政情：行墟市花市 林鄭情陷君子蘭
政務司司長林鄭月娥尋日先後到天水圍天秀墟及荃灣沙咀道公園行年宵花市，其中喺天水圍天秀墟仲食咗一粒魚蛋添！大家有冇覺得奇怪點解有一粒魚蛋食呢？皆因林鄭行到熟食檔時，突然話淨係想食一粒魚蛋，所以就買咗一串魚蛋，而食剩嗰啲就由同行嘅兩位陳太搞掂，即係民政事務總署署長陳甘美華同東華三院主席陳文綺慧囉！
除咗食魚蛋，林鄭仲喺天秀墟買咗啲印尼小食同乾魷魚，之後就去咗荃灣行花市喇，買完花，又買畫，最後仲特意幫襯一班大學生買咗個暖手枕添。其實林鄭一去到花市，就到一個蘭花攤檔睇花，又問檔主各蘭花品種嘅名，睇過蝴蝶蘭、彗星蘭同君子蘭，最後用咗近九百元買咗盆君子蘭，唔知林鄭係咪被呢種花嘅名吸引呢？
花語「高貴、有君子之風」
我哋翻查資料，原來君子蘭嘅花語係「高貴、有君子之風；有才而不驕，得志而不傲，居於谷而不自卑」，莫非林鄭覺得自己似呢種花，所以對佢情有獨鍾？不過，聽聞呢種花忌高溫，政府呢個咁熱嘅廚房，係咪適合君子蘭生長o架？