為咗歡度新春闔家團圓，神州大地每逢農曆新年都會上演波瀾壯闊嘅「春運」，情況就好比非洲草原蔚為奇觀嘅動物大遷徙。春運除咗一票難求之外，另一個賺人熱淚嘅元素係奪命車禍特別多，東邊撞一撞，西邊炒一炒，車毀人亡唔知導致幾多個家庭支離破碎。
因乜事幹春運路上咁多冤魂嘅呢？或者應該咁樣問，因乜事幹中國式駕駛習慣硬係會撞到一塌糊塗嘅呢？本來功夫茶唔係好明，不過家陣有少少眉目，因為中國式駕駛習慣源於中國式考牌作風，而呢一種作風隨時造成白癡都考到車牌！
內地傳媒報道，廣東湛江市民參與駕駛考試，除咗要繳交考試費之外，仲要被教練收取「孝敬費」，實際上就係賄賂考官。湛江市紀委證實，靠孝敬費斂財嘅四十幾個考官正被調查，湛江市交警支隊車管所所長梁志雄被雙規處理。涉案嘅眾多考官之中有三十九人交出全部或者部分紅包，總計二千一百幾萬元人民幣。
呢嗱嗱嗱，你都咪話唔恐怖，車牌竟然係用錢買，邊個夠膽保證有車牌等於識開車？萬一車牌主人居然係左右不分嘅路癡，甚至係紅綠莫辨嘅色盲，唔衝紅燈撞到亂七八糟先至奇啦！
好衰唔衰特區政府見錢開眼，以經濟利益為名打算推出粵港自駕遊，即係容許內地司機開車南下來港旅遊消費。喂，莫講話佛山小悅悅見死不救事件隨時喺香港翻版吖，即使內地司機炒車之後唔係不顧而去，亦唔似國產官二代咁樣拋出一句囂張到爆嘅「我爸是李剛」，始終冇人想見到車禍頻仍傷亡慘重。
講到中國式駕駛習慣，有一家嘢更加得人驚，內地司機往往因為唔想供養對方一世而將傷者直接變成死者，具體辦法包括入後波倒車輾多幾輾，或者索性落車向目標人物狂捅幾刀。正所謂習慣成自然，粵港自駕遊話唔定有類似事件發生。
偉大祖國乜都假，假藥、假食品、假軍官、假處女、假車牌都算嘞，連身份證都未必係真o架。內地有貪官被揭發擁有幾十個物業之後，調查所得原來佢哋有幾張改頭換面嘅身份證明文件。亦即係話，張三未必係張三，李四未必係李四，粵港自駕遊若然出現奪命車禍，肇事司機一個屈尾十就可以逃之夭夭，你吹得佢脹呀！
所以計功夫茶話齋，粵港自駕遊真係要三思而後行，切忌盲目推出呢一個有機會禍港殃民嘅笨策。冇錯，愈諗愈覺得係笨策，撇開車毀人亡唔計吖，汽車增多等於廢氣更多，官老爺嫌香港空氣唔夠污染咩！