政情：全國政協無份 閉關幾日 貪曾終露面
「貪曾」前特首曾蔭權爵士在任期間，被本報揭發貪盡海陸空，除惹得全港市民討厭外，更被北京嫌棄，上星期傳出嘅全國政協名單中，貪曾榜上無名。佢上星期四發表聲明，死撐係佢自己因為廉署嘅調查，而婉拒參與全國政協的高層工作，明顯此地無銀。
被問情況 尷尬藐嘴
日前中央公布全國政協名單，貪曾果然一如預期所料無名，未知佢是否太傷心，佢閉關幾日，至尋日終於露面。尋日早上七時半，佢一如以往乘座駕AM388現身跑馬地聖瑪加利大堂，由G4保鏢貼身保護。
約四十分鐘後，貪曾手持iPad離開，被記者問到有冇到廉署落口供同現時是否需要保釋候查等問題時，即一臉尷尬兼嘴藐藐，強顏歡笑，其後更急急腳上車，返屋企繼續閉關。