政情：CY高官排隊冧嫻姐
農曆新年將近，唔少立法會議員都會寫吓揮春畀街坊，又或者同街坊食餐團年飯。工聯會超級立法會議員陳婉嫻今日起一連三日都會請班獨居長者喺酒樓食團年飯，最特別嘅係特首梁振英（CY）、政務司司長林鄭月娥同另外兩位高官排隊出席，可以話係畀足面。之前CY喺施政報告裏面冇明確講標準工時立法嘅時間表，激到嫻姐發晒火，莫非CY依家要帶埋啲高官排隊同嫻姐團年修補關係﹖
嫻姐今日起一連三日喺黃大仙一個商場嘅酒樓同長者街坊食團年飯，CY、林鄭月娥、食物及衞生局局長高永文同勞工及福利局局長張建宗就會分三日出席。嫻姐今次嘅團年飯擺足三日，CY同作為政府第二把交椅嘅林鄭月娥都畀面到場，真係好唔尋常。
期望換來失望
其實當初工聯會咁支持CY做特首，都係諗住CY同佢哋理念相近，大家有偈傾。點知CY上任以嚟，可以話一次又一次令工記失望。好似最低工資咁，工記起初要求提升至時薪三十三蚊，但政府堅持三十蚊，為免打工仔捱多兩年，工記惟有「接受」民調建議嘅三十蚊，而佢哋提出嘅「一年一檢」就始終未能如願。長者生活津貼方面，工記要求對七十歲以上長者撤銷資產審查，但政府就玩「突襲」，最後毫不讓步咁通過原方案。而對於工記一直話要就標準工時立法，CY發表施政報告時就只係話會諮詢，激到嫻姐喺答問大會發火，質問CY點解「食」咗「立法」兩隻字。
疑要修補關係
CY政府同工記計計埋埋都積埋唔少牙齒印，今次CY帶隊同嫻姐食團年飯，好難唔畀人講係修補關係。我哋問過嫻姐嘅助理，佢就話其實係因為班長者話好想見CY，但出席嘅長者坐埋有成一百圍，酒樓話唔夠位，要分三日擺。佢仲話CY同班高官咁畀面完全同嫻姐發火係冇關係喎。
喺黃大仙連擺三日嘅酒樓，老闆係最低工資委員會商界委員黃傑龍，佢話呢三日收工聯會友情價，仲送年糕畀長者抽獎添。勞資同政府三方面一團和氣，過咗年，再拗過。