政情：馬豪輝太太教煮溏心鮑魚
好快就到農曆新年，一家人唔想出街食團年飯，其實喺屋企煮都一樣食到靚餸。港區人大代表馬豪輝太太馬廖千睿（Elaine）日前就特意買入一批靚乾鮑，打算煮番餐愛心大餐慰勞吓老公。佢跟過「阿一」楊貫一學煮鮑魚，好慷慨咁將煮溏心鮑魚嘅秘方同大家分享。
Elaine早前喺上環海味街相熟嘅舖頭，買咗一斤廿二頭嘅吉品靚鮑魚。佢話老公最愛食吉品鮑，揀時要留意係咪「舊水」，即係至少放六年以上，顏色較深、腰圓背厚嘅至係上品。Elaine話煮乾鮑第一步係要浸水，浸大約三日後體積變大，先會炆得入味。
炆完再焗過夜
Elaine教路，炆鮑魚要有耐性，大約炆八至十個鐘後，仲要焗過夜。第二日拎出嚟放喺通風及陰涼地方吹一至兩個鐘，等鮑魚收水同埋轉溏心色，呢個步驟簡單但好關鍵。等到鮑魚收晒汁之後，就可以放入雪櫃保存，到食嘅時候加番啲鮑汁蒸個零鐘，最後上芡汁就大功告成喇。