政情：中環出更：霍麗萍「有借有還」
做得豪門千金小姐，家教好緊要。好似已故全國政協副主席霍英東女兒霍麗萍（Pat），就係城中典範。Pat霍早前同媽媽呂燕妮喺中環High Tea勝地的Cafe Landmark飲茶後，跟手將「借」來嘅座椅推番原位，認真有手尾。
說話陰聲細氣嘅Pat，作風一向低調。除非係搞個人攝影展，否則好難見到霍家大小姐露面。但佢好錫媽咪，上周三中午十二點幾，搵埋媽媽同兩位好友齊食晏。四位女士好細食，全程傾偈多過食嘢，傾到重要話題，Pat即時拎本記事簿，戴番副老花眼鏡，細心地Mark低重要資料。素顏現身嘅佢，食完飯後未有補妝，反而係媽咪急急拎支唇膏出嚟，認真貪靚。
用完的櫈 推回原位
坐咗一粒鐘後，Pat先行離去，留低媽咪同友人慢慢傾。見佢起身後，並冇急急腳走，而係將原來屬於隔籬枱嘅櫈推回原位，餐廳職員見狀，一個箭步上前幫手，Pat笑咪咪話：「唔該晒！」好有禮貌。
食完晏，Pat喺商場行咗兩個圈，原來係會合正喺影音店內等佢嘅朋友，店員熱情地招待，但兩人睇唔啱冇幫襯。卓妮上前打招呼，Pat報以微笑，佢話近年未有乜嘢大計，都係忙於影相，生活認真悠閒。