年紀大，機器壞，每個人到咗咁上下年紀始終需要照顧。情況就好比歷史建築物，長年累月風吹日曬梗係需要保育㗎啦。好衰唔衰，港產官僚一直以來都係非常忤逆嘅不孝子孫，古迹又唔保育，長者又唔照顧，建築物同老人家都歷盡滄桑，臨老真係未必過到世o架。
立法會有一個長期護理政策聯合小組委員會，尋日召開公聽會聽取業界意見。安老服務協會主席陳志育就批評嘞，施政報告冇提出增加長者護養宿位，老人家輪候護養院宿位嘅時間愈來愈長。點長法呢？即係咁，十年之間由呆呆地等十三個月，增加至癡癡地等三十七個月。喂，一等就等足三年零一個月，已經風燭殘年嘅老人家未必有咁長命喎。事實上不少長者喺輪候期間溘然離世，所以陳志育促請政府正視問題，盡快增撥資源實現老吾老以及人之老嘅理想。
另外咯喎，防止虐待長者協會幹事曾昭偉話呀，施政報告提出明年起三年內合共提供一千七百個宿位，根本不足以應付現有需求。曾昭偉仲話，政府提出居家安老概念等於叫長者喺社區安息，要求政府考慮將空置校舍改建為護養院舍。
簡單咁講，照顧老人家嘅宿位供不應求，而且業界埋怨人手嚴重不足。你估官方代表有乜嘢回應吖嗱？勞工及福利局官員就話嘞，長者護養宿位供求受多個因素影響，包括院舍長者離開時間各有不同，以及輪候長者是否願意接受編配，難以制訂具體輪候宿位時間嘅指標。
唉，官腔始終係官腔，一句「難以制訂」就企圖蒙混過關。功夫茶點都唔信，新界有咁多荒廢土地，竟然唔可以地盡其利發展為安置老人家嘅護養院舍。仲有喎，將空置校舍改建為護養院舍不失為一個好提議。你知啦，呢幾年官老爺手起刀落不斷殺校，人去樓空嘅校舍如果唔循環再用，養老鼠好浪費啫。
冇錯，新界真係有好多荒廢土地o架，如果唔係都唔會出現咁多「農地興建豪宅」嘅古怪新聞啦。正正係政府冇地盡其利，所以搞到有人走法律罅化身另類豪宅業主。計功夫茶話齋，莫講話護養院舍嘅問題可以透過荒廢土地嚟解決，就算要解決長期令到蝸居一族寢食不安嘅居住問題，亦都不妨好好利用荒廢土地嘅剩餘價值。
地有地荒廢，人有人閉翳，當今政府仲好意思話「民生無小事」？當然啦，港府弱勢，舉步維艱，自顧不暇，未必再有精力及魄力急民之所急。但無論點都好，安老問題已經迫在眉睫，長者唔可以再癡癡地等嘅喇！